Andaluziako Reincidentes taldea Euskal Herrian izango da asteburu honetan;  hiru kontzertu eskainiko ditu bira txikian. Ostegun gauean Bilboko D8 Sorkuntza Faktorian ariko dira zuzenean 20.30etik aurrera. Ostiralean Iruñeko Indara aretoan izango da hitzordua, eta larunbatean, azkenik, Gasteizko Jimmy Jazz bisitatuko dute, non Aimarrek zabalduko duen emanaldia. Hiru kontzertu hauetan berriki kaleratu duten ‘¡Peligro!’ diskoa aurkeztuko dute, urte honetako otsailean argia ikusi duen estudioko azken emaitza. Emanaldi hauetako sarrerak vivaticket atari digitalean eskura daitezke.

Sevillatik Euskal Herrira

80. hamarkadaren erdian sortu zen Reincidentes taldea Sevillan. Hastapenetatik askotan aritu izan dira Euskal Herrian zuzenean, eta kasik esan dezakegu gutariko bat direla. 38 urteko musika bidean diskografia oparoa batu dute eta guztira 22 diskotik gora argitaratu dituzte, tartean euskaraz egindako kanturen bat ere bai. Eskaini dituzten emanaldiak, berriz, milaka izan daitezke, eta horietako asko eta asko gure herrietako gaztetxe, jaialdi eta herriko jaietan izan dira. Estatu espainola goitik behera zeharkatu dute, eta itsasoz bestalde ere aritu izan dira Kolonbia, Nikaragua, Txile, Mexiko edo Argentina bisitatuz kontzertu biretan. Gazteleraz egindako rock musikan ezinbestekoa da Andaluziako taldea, eta erreferente handi bat gerora etorri diren talde askorentzat, baita Euskal Herriko musika taldeentzat ere.

‘¡Peligro!’ diskoa taldearen estudioko 22. emaitza da; tinko eusten diote haserako garaiei. Kantu zuzen eta borrokalariak lantzen ditu Fermando Madina baxu-jotzaile eta abeslariak gidatzen duen laukoteak, eta hitzetan gai sozial eta politikoetan murgildu dira beste behin ere. Musika bozgorailu bezala ulertzen du bandak, eta anplifikadoreak topera jarriko dituzte asteburu honetan gurean eskainiko dituzten hiru emanaldietan.