Xiberoots taldeak disko berria kaleratuko du egunotan, eta bide horretan asteburu beroa izango du bandak bi emanaldi eskainiz segidan. Alegiako eta Hazparneko gaztetxeetan ariko dira zuzenean ostiral eta larunbatean hurrenez hurren, eta bietan ‘Zer agitüko’ lana aurkeztuko dute. Ostiralean Alegiako gaztetxean izango da hitzordua, eta gaueko 23.00etan hasiko da musika festa. Emanaldia amaitzean Dj Üzkülüz ariko da musika jartzen, gaualdia borobiltzeko modu ezin hobean. Sarrerak aurrez Alegiako HilarioBerri eta Iskina tabernan izango dira salgai zortzi euroen trukean.

Larunbatean, berriz, Beti Plüz jaialdian ariko da banda Hazparneko Ttattola gaztetxe berrian, eta bertan, Pangea Pop taldea eta Kalume txaranga izango dituzte afitxean lagun. Kontzertua 21.00etan hasiko da eta sarrerak emanaldia hasi baino ordu erdi lehenago jarriko dira salgai gaztetxean bertan.

Hirugarren diskoa

‘Zer agitüko’ izena darama Mauleko bandaren estudioko disko berrienak. Hamar urteko bidean kaleratzen duten hirugarren lana da honakoa, eta aurrez landutako musika bidean sakontzen du taldeak grabaketa berrian. Sustraietara loturik tinko, reggae giroak dira nagusi disko berrian ere, ohiko dub eta ragga giroak mantenduz, eta era berean melodia poperoetara bideratuz sorkuntza berriak. Izan ere, berriki sarean zintzilikatu duten ‘Gerla’ bideoklipean argi ikusten dira tendentzia berri horiek, musikalki erritmoak pausatuz eta ahots melodiei bestelako bira bat emanez. Kantu berriekin batera taldearen klasiko guztiak entzuteko aukera izango da bi gaualdietan, beraz, dantza eta algara ziurra da Maulemuffinaren erregeekin.