Gasteizko Probintzia Plazan, hiriko erdigunean, ‘Iruña Veleia, 3,000 urteko historia’ erakusketa ikusgarri izango da apirilaren 4a arte. Erakusketa horren bidez, «aztarnategia lurraldeko hiriburura hurbildu nahi da», herritarrek «pixka bat gehiago» ezagutu dezaten.

Hala adierazi du astelehen honetan Inmaculada Sanchez Arabako Foru Aldundiko Kultura zuzendariak, 20 panelez osatuta dagoen erakusketa aurkezteko egindako ekitaldian. Bertan izan dira ere Javier Fernandez Bordegarai Museo eta Arkeologia Zerbitzuko burua eta saileko teknikariak.

«Aztarnategi ikusgarri horren garrantzi historiko eta ondare handiaz kontzientziatu egin nahi da. Izan ere, guztion lana da gure historia gogoan izatea, eta gure aldetik, arabarrei eta bisitatzen gaituztenei gogoraraztea altxor bat dugula gure lurraldean, bisitatzea merezi duena», azpimarratu du.

Hala, erakusketarekin batera, ‘Iruña Veleia 2022-2025’ biziberritzeko eta garatzeko proiektuaren barruan aztarnategia ikustarazteko beste ekintza batzuk egingo direrla nabarmendu du Sanchezek.

Azaldu duenez, bista gidatuen urteko programa mantenduko da, Aste Santutik irailera arte. Joan den urtean 4.000 lagun baino gehiagok bisitatu zuten aztarnategia, gehienak arabarrak. «Familiak eta taldeak etortzen dira, eta gure nahia da jende gehiago etortzea». 

Era berean, informazio panelak berrituko dira, nortasun korporatiboa aldatuko da eta gida arkeologiko bat argitaratuko da. Eta lanean ari dira Lakuako Gobernuarekin ekimen gehiago antolatzeko, «beti ere ikerketa sustatuz». 

Erakusketari dagokionez, paneletan azaltze da zein den Iruña Veleiaren jatorria. Hiria K.o. I eta II. Mendeetan lortu zuen goreneko maila eta 126 hektareako azalera izatera iritsi zen. Gaur egun galtzada erromatarraren aztarnak ikusi daitezke, eta Macellum izenarekin ezagutzen den Veleiako azokarenak ere.

Sarrera doan da.