Aurrera doaz Abadiñoko Amaraun Arte Fabrikan domeka goizetan egiten diren zuzeneko emanaldiak. Apirilaren 6an Kokein taldearen txanda izango da, ‘Bidea da helmuga’ disko berria aurkezteko, 2024ko neguan argia ikusi zuen estudioko azken emaitza. Sarrera fisikoak Zelaietako Jubilauetan (Abadiño), Portalekua (Elorrio), Intxaurre (Durango) eta Sorgin (Zaldibar) tabernetan eskura daitezke aurrez, eta egunean bertan emanaldia hasi baino lehen. Ez da online salmentarik izango. Ateak 12.00etan zabalduko dira eta 13.30ean hasiko da kontzertua. Zuzeneko musikaz gozatzeko aukeraz gain, ez da jatekorik ez edatekorik faltako aretoaren terraza ederrean.

Bidea da helmuga

1999 urtean sortu zen Kokein taldea Eibarren, eta geroztik ez dira furgonetatik jaitsi. Ibilbide luze bezain oparoa osatu du bandak, eta estudioko diskoak eta zuzeneko emanaldiak tartekatu dituzte urte hauetan guztietan. Izan ere, taldearen diskografia luzea bezain oparoa da, bidean estudioko zortzi lan argitaratu dituztelarik etenik gabeko ibilbidean. Horietako azkena ‘Bidea da helmuga’ izenpean argitaratu dute Balaunka zigiluaren babesean. Taldeak egindako 4 kantu berriekin batera, lagunek egindako beste bost abesti biltzen ditu diskoak. Izan ere, Zea Mays, Eraso!, Nakar, Mursego, edota Miren Narbaiza, Ander Mujika eta Joseba Baleztena musikariek  Kokeinen kantu bat moldatu dute beraien erara, ‘Lotua egon arren’, ‘Zain egon gabe’, ‘Ate joka’, ‘Itzalak’, edota ‘Gora Begiratzean’ bezalako kantuei bizi berri bat emanez.

Rock sutsua

Rock giroetan dator Kokein taldea. Hori da bere eragin nagusia, eta urte hauetan guztietan hor egon dira kokatuta. Horrek ez du esan nahi beti eremu berean egon direnik; disko bakoitzean bide berriak bilatu ditu bandak, betiere sustraiak galdu gabe. Saiakera ezberdinak egin ditu boskoteak, eta 90. hamarkadako rock alternatibotik hasita, stonerra edo erritmo poperoagoetara egin dute bidaia, azken urteetan elektronika lanabesak lagun, bide berriak jorratuz.

Haritz Lete (bateria eta azpi-ahotsak), Jatsu Argarate (urteak atzera baxuan eta orain gitarran), Zaloa Urain (ahots nagusia), Iker Saenz Zaitegi (gitarra eta azpi-ahotsak) eta Edu Arginzoniz (baxua) dira egun Kokein, eta horrela taularatzen dira zuzenekoetan. Abadiñon ere horrela ariko dira, 25 urteko musika bidea errepasatuz zuzeneko beroan.