Zilibito Records kolektiboa Gasteizen

Data

25.04.04 - 25.04.04

Lekua

Araba - Gasteiz

Arbe, Kaene, Toutz, Txuso, Uto eta Xabi dira Zilibito Records .
Arbe, Kaene, Toutz, Txuso, Uto eta Xabi dira Zilibito Records . (BAGA BIGA)

Zilibito Records kolektiboak disko berria aurkeztuko du ostiral honetan Gasteiz hiriko Izaskun Arrue Kulturgunean eskaini behar duen emanaldian. Zilibito Records indarrean datorren gazte belaunaldi baten parte dira, musikalki giro berrietan datorren korronte baten izebergaren puntetako bat. Saioa arratsaldeko 20.30ean hasiko da eta sarrerak aurrez eskura daitezke 10 euroko prezioan aretoaren atari digitalean.

Deabruen doinuak

Lau abeslarik eta bi produktorek osatzen dute Zilibito Records kolektiboa; 2020 urtetik daude martxan. Sortu eta berehala argitaratu zuten demo lanari esker Gaztea irratiaren maketa lehiaketaren Epaimahaiaren saria eskuratzea lortu zuten, eta horrek lehen diskoa grabatzeko aukera eman zion seikoteari. 2024ko neguan Baga Biga diskoetxearen babesean ikusi zuen argia taldearen lehen disko luzeak ‘Deabruen doinuak’ izenpean, non giro elektronikoetatik abiatuta, trapa, technoa, reggaetoia, rapa, edo rock sutsua entzun daitezkeen konplexurik gabeko doinu kokteleran. Taldearen ezaugarrien artean auto-tunea dago, abeslari guztiek erabiltzen dute, bestelako ahots moldaketarako lanabesekin batera, non errima eta erritmo bizien bidez deabrukeriak aipatzen dituzten disko monografikoan. Musikalki, ordea, anitza eta koloretsua da Zilibito Records taldearen lehen lan luzea, eta diskoak dituen hamahiru kantuetan zehar, askotariko musika eraginak entzun daitezke, kolektiboaren aniztasunaren seinale.

Elkarlana

Diskoaren indar guneetako bat abeslari eta produktore ezberdinekin egindako elkarlanean dago. Mr. Luken, Malakias, Muitiko, Xsakara, Etxepe kolektiboa edota Rally 48 taldea izan dira diskoan parte hartu dutenak, eta bakoitzak bere kolorea eman dio Zillibito Recordsek zirriborratutako abestiari.

Zuzenean ere seikote bezala taularatzen dira, eta horrela ariko dira ere ostiraleko emanaldian. Areto eta klubetako musika lantzen dute nagusiki, baino Izaskun Arrue Kulturgunea leku egokia izan daiteke ere taldearen doinuekin gozatzeko. Ez da hau asteburu honetan eskainiko duten emanaldi bakarra, larunbatean ZEID Fest Gaztea jaialdian izango dira Barakaldoko BEC gunean.

Kokapena

Izaskun Arruti Kulturgunea
Errementari Kalea 32
Gasteiz. Araba

Loturak