ARTOLA - MARIEZKURRENA II 22

LASO - IZTUETA 14

«Sekula izan ez ditudan sentsazioak izan ditut». Horra Jon Mariezkurrenaren laburpena Bilboko Bizkaia pilotalekuan eskaini duen erakustaldiaren ondotik. Kolpe ikaragarria duen arren, karisma ere badu Berriozarko atzelariak eta kolpea adina karisma erakutsi ditu Binakako Txapelketako finalerdietako ligaxka honen aurreneko jardunaldian puntua ateratzeko.

Izan ere bere aurrelaria, Iñaki Artola, ez da batere fin aritu, azkenean errematean sei bat tanto amaitu baditu ere. Tarte baten Unai Lasok dantzan izan du eta partida arriskuan jarri du gorrientzat Bizkarreta-Gerendiangoak eskaini duen tarte bikain batek. Hain zuzen 11-5etik 11-12raino joan da markagailua.

Une horretan gorriei eustea egokitu zaie, baina 13na berdindu ostean pilota aldatu dute eta orduan bai, orduan mila puska egin du partida Mariezkurrenaren erakustaldiak. Iztuetak dena eta gehiago eraman du, baina ezin atzeko zulotik atera eta Unai Laso bera, bere atzelariari lagundu nahi horretan, oso erremate zailetan galdu da. Azkenean, ekinaren ekinez, Artolak berak ere lagundu dio bere atzelariari finalera begirako aurreneko puntua lortzen.

«Tentsio ikaragarria nabaritzen zen, baina kantxan oso eroso nintzen eta fisikoki ere oso ongi egon naiz. Arratsalde borobila izan da», onartu du azkenean Jon Mariezkurrenak.

Zartailua dantzara

Hain zuzen, Mariezkurrena eskuin eskuko zartailua dantzatuz hasi da, Iztuetari bizkarra erakutsiz. Horren aurrean airez laugarren koadroaren oso atzera aterata aritu da Unai Laso, azken asteetako eskuetako arazoak ahaztu dituela erakutsiz. Iztueta eta Artolak lasaiago ekin diote demari, batez ere Alegiakoak, bere atzelariaren ahala baliatu nahirik.

Ez dute askorik behar izan gorriek 4-1 aurretik jartzeko. Hala ere, Iztueta berehala egokitu da neurketaren mailara eta erreboteko zulotik eta ezker hormatik oso pilota zailak jaso eta kentzen asmatu du. Lasok, berriz, hankasartzeren bat eginagatik, ahal izan duenean tantoa nahasten ere asmatu du, aurrean Artola nahikoa kamuts hasi dela ikusita. Ondorioz, 4-2ekotik 5-4ra berehala pasa da markagailua, Bizkarreta-Gerendiango aurrelariak izan dituen aurreneko aukerak baliatuta.

Ez du aurrelari nafarrak berdintzen asmatu eta Artolak ezkerren zabalean egindako dejadaren ostean gorriek ostera ere aldea atera dute: 8-4, behingoagatik pilotakada gutxirekin tanto ilara bat egiten asmatuta; azkena, Mariezkurrenak bederatzigarren koadroan Iztuetari baztertu dion pilota, hain justu. Ezinbestean, partida etetea erabaki dute urdinek.

Artolak errematean eman ez duen mina eman du sakez, gehienak eraman beharrekoak izan badira ere. Aukeran Unai Laso finago aritu da errematean, bi hormako batekin eta 11-6koa ezarri duen ezker gantxoaz erakutsi duen moduan. Baina noski, ordurako gorriek aldea atera dute, urdinen akatsak eta piloteoa Mariezkurrenaren eskutik menperatuz.

Lasoren momentua

Nolanahi, jokoa aurreko koadroetara eramatea lortu du Lasok eta errematean Artola gaindituta markagailua estutzea lortu du aurreneko atsedenaldira iritsi aurretik. Izan ere Alegiakoa nahiko urduri aritu da, erabakirik onena hartzea kostata. Eskuin sotamanoz txokoan moztu duen pilotakada bati esker, 11-9 hurbildu dira Laso eta Iztueta eta badaezpada partida etetea erabaki dute orduan gorriek, bolada txarra ere eten nahian.

Baina ez dute eten. Sakeak aldatzen hasi da Laso eta urdinak iritsi dira aurretik aurreneko atsedenaldi luzera, 11-12, Lasok sakez hiru tanto segidan egin eta gero, 0-7ko partziala lortuta.

Lasok berak kale egin ostean eten dute urdinen bolada bikaina gorriek. Hala ere, ez da kikildu Bizkarreta-Gerendiangoa eta txokoan amaitu du hurrengo tantoa ere, Mariezkurrena aurrera eta atzera dantzari erabili duen tanto luzea errematatuz. Defentsan ere Artolaren saiakera kamutsak nahi erraz eraman ditu eta, hala, argi utzi die gorriei atzera jo eta jo arituagatik ez dutela hain erraz irabaziko.

Iztuetari ihes egindako pilotaren ondotik hartu dute berriz ere aurrea gorriek, baina ordurako pilotak ere dezente kamustu dira. Tantoak, ondorioz, asko hasi dira gogortzen. Eta hara non, gorriek ostera ere aldea atera dute.

Aukera zuzena

Mariezkurrenari zabalean iheska joan zaion pilotakada txaparen gainean izan da eta Lasok, aldiz, Artola zabalean preso harrapatu arren, txapan bertan laga du errematea. Zortea dela, nekea dela, deserosotasunak deserosotasun gorriek aldea ateratzea lortu dute, nahiz eta Artola aurreko koadroetan asmatu ezinik aritu.

Baina halakoren baten asmatu du Alegiakoak ere ezker airez txokoan uzten eta gutxien espero zenean 6-0ko partziala lortu eta 18-13 jarri du markagailua azken atsedenaldi luzera iristeko.

Zenbat aldatzen den pilota, hain zuzen pilota aldatzen delarik! Gorriek komeni zaien materiala aurkitu dute beren unerik okerrenean eta suziriaren pare egin dute gorantz, 20-13raino, hain zuzen. Ikusi egin behar urdinen erreakzioa azkenean Lasok hamalaugarrena lortu eta gero. Tamalez, bere sake-errematea hankapera joan zaio eta azkenengo tantoan, berriz, Artolak, behingoagatik, beldurrik gabe errematatu eta 22ra iristea erdietsi dute, dirudiena baino ondotxo gehiago sufritu badute ere.

FITXA TEKNIKOA

Iraupena: 70.37 minutu. Pilotakadak: 573. Sakez: 4 Artolak eta 3 Lasok. Jokoan egindako tantoak: 6 Artolak eta 2 Mariezkurrenak; 8 Lasok eta 0 Iztuetak. Jokoan galdutakoak: 1 Artolak eta 2 Mariezkurrenak; 6 Lasok eta 4 Iztuetak. Markagailua: 1-0, 2-0, 2-1, 3-1, 4-1, 4-2, 5-2, 5-3, 5-4, 6-4, 8-4, 8-5, 9-5, 11-5, 11-6, 11-12, 12-12, 12-13, 13-13, 14-13, 20-13, 20-14, 21-14, 22-14. Gorabeherak: Binakako Txapelketako finalerdietako ligaxkaren aurreneko jardunaldia, Bilboko Bizkaia pilotalekuan jokatua. Dirua gorrien alde 100 80ri. Aurreneko sakea, urdin.