Peña II.ak eta Albisuk play-offak jokatzeko txartela eskuratu dute ligaxkako azken partida erabakigarrian Altuna III.a eta Bikuña nagusitasun osoz menderatu ostean (4-22). Aspekoek hasiera tamalgarria eman diote Donostian jokatu den neurketari (0-10) eta zaleak partidarik gabe geratu dira.

Hurrengo asteburura ilusioz beteta iritsiko dira Peña II.a eta Albisu, ligaxkari amaiera oso ona eman baitiote. Lehen itzuli kaxkar baten ondoren, Baikoko bi gipuzkoarrek zazpi partidatik bost irabazi dituzte bigarren itzulian, azkena gaur bertan uste baino askoz errazago. Donostiako pilotalekuan giro aparta, egun garrantzitsuetako giroa bai kantxan bai harmailetan... baina ez da partidarik egon.

Gorriak oso gaizki sartu dira neurketan. Jokin Altunaren huts batekin lortu dute lehen tantoa urdinek eta hurrengo errestoan ere ez du asmatu amezketarrak. Hasiera bizia eman nahiko zion norgehiagokari, erritmoa sartu, Bikuñari lasaitasuna eman eta aurkariak urduritu. Baina juxtu kontrakoa gertatu da.

Donostiako atzelariarentzat egun delikatua zen: Aranguren «arrazoi teknikoengatik» kendu eta txapelketan bera sartu, partida erabakigarri batean, etxean bertan... Eta hasieratik oso galtzaile ibili da. Hasiera horretan bizpahiru pilota goiko koltxoira bidali ditu, bote arraro bat ere egin dio pilota batek... Dena aldrebes. 100 pilotakada jo gabe 0-10 galtzen ziren gorriak.

Aspekoen lehen tantoa Albisuk gora bidalitako pilota bat izan da, eta hortxe piztu da zaleentzat esperantza txiki bat. Agian pilota aldatuz egoera iraultzeko aukera izan zezaketen Altunak eta Bikuñak. Baina ez da hala izan. Albisuk bikain atzeratutako pilota batekin berehala berreskuratu dute sakea urdinek.

Eta halaxe joan da amaierara arte neurketa. Jon Ander Albisu oso fresko atzean, Peña serio jokatuz aurrean, Altuna inolako aukerarik gabe eta Bikuña erreboteko zulotik nola irten asmatu ezinik. Gorriek egin dituzten lau tantoetatik hiru urdinen hutsak izan dira; laugarrena Altunak maisuki jotako orma-bikoa izan da, egin duen lehen tantoa eta bakarra... 3-21ekoan.

«Errespetu gehixeago merezi dugu»

«Ez genuen espero horren erraz irabaztea», onartu du Jon Ander Peñak. «Hasiera txarra izan dute beraiek eta konfiantza galdu dute. Guk gurea oso ongi egin dugu, oso serio jokatuz, bakoitza bere tokian ongi. Badakigu biok ongi jokatuta bikote handia osatzen dugula. Bigarren itzuli oso ona egin dugu eta ea datorren asteburuan bide horretatik jarraitzen dugun», gehitu du.

Baina partidaren azterketaz gain, astean zehar gertatu dena ere izan du hizpide Peñak, eta nahiko kritiko agertu da hartutako erabakiekin. «Iñigok aste honetan izan duen presioa eramatea ez da batere erraza», onartu du lehenik, eta gero Aitor Arangurenekin gogoratu da. «Aitorrekin gogoratu nahiko nuke. Uste dut pilotariok errespetu gehixeago merezi dugula. Ea gure artean hitz eginez horrelako gehiago ez diren gertatzen eta hau izaten den azkena», aipatu du.

Galtzaileen artean, Jokin Altunak bere gain hartu du porrotaren ardura. «Pena handia daukat, baina ez galtzegatik, galtzeko moduagatik baizik. Aurreneko sotamanoan huts egin dut, hurrengo errestoan ere bai... Lagundu egin nahi nion atzelariari, baina ez dut asmatu. Errua nirea da, Iñigori ezin zaio ezer esan. Ematen du horrelako partida bat jokatzea aukera dela, baina ez da horrela. Aukera da partida batzuk jarraipenarekin jokatzea edo txapelketa bat osorik jokatzea», adierazi du.

Horrenbestez, play-offetako partidak honela geratu dira. Ostegunean Tolosan Artola-Mariezkurrena eta Elordi-Zabaleta bikoteak neurtuko dira, eta irabazlea finalerdietako ligaxkara sailkatuko da. Galtzaileak beste aukera bat izango du igandean Eibarren, ostiralean Zornotzan jokatuko den Jaka-Imaz eta Peña-Albisu bikoteen arteko demaren irabazlearen aurka.