Binakako finala jokoan: egoera gori-goriaren aurrean, inoiz baino lasaitasun gehiago
Binakako Txapelketaren finalerdietako azken jardunaldian erabakiko dira bi finalistak asteburu honetan. Ezkurdia-Rezusta dira hurbilen daudenak, Artola-Mariezkurrena II.ak bere alde dute egoera, Laso-Iztuetak 15 tantotan utzi beharko lituzkete aurkariak eta Peña II.a-Albisuk karanbola behar dute.
Binakako Txapelketa luze honetan, honakoa beste aste normal bat izan zitekeen. Baina ez. Asko dago jokoan asteburuan, eta bi egun hauetan Iruñean eta Donostian egindako material aukeraketetan nabaria izan da. Finala dago jokoan eta lau bikoteek dituzte aukerak martxoaren 30ean Nafarroa Arenan egoteko.
Matematiketan sartuta, Ezkurdia-Rezusta dira gertuen daudenak. Finalerdietako ligaxkan bi garaipen lortu duten bakarrak dira eta igandean, Atano III.ean, 16 tantora iristearekin nahikoa izango lukete sailkapena lortzeko. Zifra horrekin aurkari izango dituzten Laso-Iztueta eta Artola-Marizkurrena II.arekin berdinduko lukete berdinketa hirukoitz hipotetiko batean. Baina tanto orokorren batuketa Aspekoen aldekoa litzateke.
Nahiz eta egoera baikorra izan, Ezkurdiak eta Rezustak zuhur jokatu nahi dute; izan ere, «haiek abantaila hartzen badute, dudak sar daitezke», adierazi zuten Aspekoek.
Laso-Iztuetaren egoera zailagoa da. 15 tanto edo gutxiagotan utzi beharko liekete aurkariei igandean. Beste aukera bat da larunbatean Artola-Mariezkurrena II.ak Labriten galtzea eta igandean edozein emaitzekin irabaztea. «Ilusioa» izan zen Iztuetak erabilitako hitza «zaila» izango den jardunaldiaren atarikoan.
Artola-Mariezkurrena II.ak, bere alde
Artola-Mariezkurrena II.ak bere alde dute sailkapena. Irabaztearekin eginda lukete. Baikoko bikoteen artean garaipen bakar batekin berdinketa hirukoitza emango balitz, nahikoa lukete 15 tanto egitearekin.
Berriozarreko atzelariak, dena den, argi du «irabaztera» joango direla. «Aukera asko daude finalean sartzeko, baina gure partida irabazi behar dugu, horrek emango bailiguke sailkapena», azpimarratu zuen asteartean. Labriten izan ziren ere Peña II.a-Albisu. Karanbola bat behar dute finalera iristeko: aurkariak 8an utzi eta igandean Baikokoek galtzea. «Gurea egin behar dugu», onartu zuen Ataungo atzelariak.
Iker Elizegiren agurra
Iker Elizegik Baikorekin duen harremana amaituko da. 2020an egin zuen debuta Asteasuko Usarrabi pilotalekuan eta ordutik hona ia 150 partida jokatu ditu. Bere azken partida martxoaren 29an jokatuko du Tolosako Beotibarren.
Baiko Pilotak eskerrak eman dizkio Elizegiri «urte hauetan azaldu duen profesionaltasunagatik», eta etorkizunean zortea izan dezala opa dio.
Joseba Ezkurdiaren aita zendu da, pilotariak Binakako txapela eskuratu eta ordu gutxira
Muestras junto a Zubieta arrojan el mayor índice de contaminación por incineración en Europa
Un árbol único, que solo existe en siete pueblos navarros, está en plena floración
Hondarribia recibe la inesperada visita de un ejemplar adulto de ballena de gran tamaño
